رمضان وتنوع العبادات

اهلين :)

طيب بما ان الدنيا رمضان.. واكيد كل واحد مشغول في صيامه وقيامه.. ومع العائلة والتحضير للعيد..

ما احس التدوينات العادية تنفع... عشان كدا حبيت اتشارك معاكم في موضوع مهم..

غالبا قبل رمضان الهمة تكون عاليه ونقعد نخطط كيف رمضان هيكون وكم مرة هختم القران ! ونبدأ بحماس وبعدين يخف .. ما هقول يختفي عشان لا ابالغ بس يعني لو ختمنا مرة نكون انجزنا وطبعا في ناس ماشاء الله بتختم 3 مرات وفي نفس الوقت مع ظروف الشغل والارتباطات العائلية في ناس ما بتقدر..

عموما التدوينة دي عشان افكركم اننا نقدر نتقرب لله سبحانه وتعالى بطرق كثير ولا نحصر العبادة والاجر في صلاة القيام او قراءة القران

يعني ممكن..

*خصصي 10 دقائق تدعي ربنا من قلبك .. ولا ننسى ان الدعاء مخ العبادة..

*الاستغفار والتسبيح والصلاة على النبي صلى الله عليه وسلم (الذِكر)عبادة ثانية .. وسهلة وممكن تكون في أي وقت واي مكان

* صلة الارحام.. انك تتصلي وتسألي وتسلمي بنية التقرب الى الله

* الجيرااااان .. لما ترسليلهم صحن من أي شي سويتيه في البيت او جبتيه من بره بنية افطار الصائم و تهادوا تحابوا

* اقل شي ممكن يكون الابتسامة .. بنية ادخال السرور على قلب المسلم..

وغيرها كثير .. بس اخلصوا النية :)

ن

Leave a Comment وجهة نظر

بسم الله نبدأ

السلام عليكم ورحمة الله وبركاته

اهلا وسهلا بكن (;

مين ن؟

 اسمي نورا من جده..  هواياتي كثيره لكن طموحاتي اكثر .. احب أي شي يدعو الى التفاؤل والسعادة .. لا اسعى للمثالية ولكن.. السلام الروحي عندي اساسي .. هدفي اني اترك بصمة  إيجابيه في حياة كل انسان.

متى بدأت التدوين؟

 بدأت التدوين من 2011 بس كتبت كام موضوع في كام شهر  وبعدين تركت عشان سافرت وانشغلت

كيف كانت المدونه؟

كانت عبارة عن مجموعة من الخواطر.. على مواقف .. على دروس.. اقدر اقول كانت مكان للفضفضة ليس إلا..

ايش صار طيب؟

 قررت ارجع دحين بس بستايل مختلف..

ليش؟

ابغاها تكون مدونة حياتيه.. فيها كل شي .. اغلب المدونات الموجوده يا اما مدونات للتجميل او للخواطر او للطبخ.. ليش ما تكون كولو؟ ليش ما تكون عننا عن حياتنا عن يومنا عن المواقف الي بنمر فيها؟ عن الاشياء الي نحبها وكمان عن كيف نبغى نكون؟ انا شخصيا احب أي شي جديد ومفيد..

ن

Leave a Comment