Le Concheur Chocolate... تقيمي ل- لوكونشير للشكولاته

اهلين :)

اليوم الموضوع جدااا محمس !!

هتكلم عن محل للشكولاته .. هو نفسه يصنع الشكولاته والكيكات وكل شي ويمديكي كمان تشوفيهم وهما يسوها :)) بس قبل لا أتكلم عن المحل وتجربتي فيه .. هتكلم عن كيف سمعت عنه :) 

قبل فترة رحت تديكس .. حق دي السنة وكان من ضمن للسبيكرز واحد انسان بلجيكي انا مو مرة اهتميت .. لان كنت مركزة على الناس الثانين .. المهم لما جينا دخلنا وزعوا علينا شنطة قماش فيها كتابين هدية وورق وكوب .. وعلبة صغيرة فيها قطعتين شكولاته ..

بعدين ساعتين من الجلسه بدأت اجوع .. قمت قلت خليني اجرب .. وذقت شي! حسيت انا فين؟؟ استحاله تكون شكولاته من هنا!! الطعم التركيز التوليفه مختلفه! انا من عشاق الدارك شوكلت! فكان في حبتين وحده دارك والثانيه عاديه وبدأت بالدارك واعطيت صحبتي العادية .. واحنا الاثنين نعشق الشكولاته.. وذهلنا بالجوده والطعم والتركيز .. المهم شوية واحنا جالسن طلع الانسان البلجيكي (إريك) وقعد يتكلم عن نفسه وكيف بدأ واربطت وجود علبة الشكولاته أخيرا!! هو الي مسوي دي الشكولاته القاتله ..

قعد يتكلم انه بلجيكي وطبعا بلجيكا مشهورة بشكولاتتها .. وكيف درس قانون وبعدين درس تسويق كل دا عشان اهله اصروا عليه يدرس شي نظري وما يتجه للحلويات كمهنه وتخصص .. وبعد كام سنه شعر فيها بالضياع قرر يروح لندن ويبدأ هناك وفعلا بدأ بمحل صغير واشتهر .. وبعدها قرر يجي السعودية ويفتح المحل هنا وفعلا بدأ يحقق حلمه ..

أسلوبه كان حلو وفيه حماس .. والصراحة الشكولاته الي اكلتها هي المحرك الأساسي اني اتحمست على قصته لانها فعلا كانت حلوة :)

سألنا على المكان وعرفنا ان عندهم فطور مو بس شكولاتات وقررنا انا وصحبتي نروح مرة على الفطور ..

وبعد دش الكلام الي فوق اتركم مع الصور على تستمتعو :))))

الدور الثاني فيه جلسات .. وكمان فيه مطبخ خاص لتعليم كيفية صنع الشكولاته .. عجبتني الفكرة كرحلة مدرسيه او هديه لصحبتك او لا ي احد تحسي انه ممكن يحب يتعلم شي زي كدا :)

الجلسات ..

المطبخ ..

نيجي للفطور ..

بيض بالسالمون .. كان لزيز

الوافل :)))))))))) اللزيز لانه كرسبي والشكولاته الي عليها

الكريب بالشكولاته :))) قاتل!!

القهوة .. حلوة

طلبت شي من باب التغير .. عبارة عن شكولاته بالشطه .. ومرة عجبتني

في النهاية صحبتي اخذت لزوجها كيلو من شكولاتتهم .. وصورتها .. مرة تواجه في هديه .. بس يبغالها احد ذويق .. ويحب الشكولاته :)

نيجي للتقيم ..

1- المكان في شارع الأمير سلطان .. يعني مكانه معروف وسهل الوصف والوصول ..

2- جدا نضيف ومرتب ويفتح النفس

 3- الخدمة .. كويسه بس ماهي ممتازة

4- الاكل مرة لزيز واسعارة ما تختلف عن الكفيهات الثانيه

حابه تعرفي اكثر وفين العنوان :

http://www.jeddahfood.com/le-concheur/

http://www.sufrati.com/sa/rest/le-concheur

ن

6 comments المطاعم