College 101 .. لا للتسويف

اهلين :)

اليوم ابغى أتكلم معاكم واشاركم شي مررة مهم وبالصراحة مو بس لبنات الجامعة لا لاي شخص ! بيسوي أي شي حتى لو ام وما عندها وظيفة غير بيتها وعيالها!!

هتكلم عن ازمة التسويف الازلية.. ديما ما يكون فينا ودايما ما ابغى ودايما بعدين؟ وبعدين فجأة لا لازم دحين أقوم اسويه

هتكلم اليوم عن الجامعة اكتر شي مع ان النصائح دي تنفع للموظفين وربات البيوت وطلاب المدارس واي احد بيعاني من دي المشكلة ..

انصح بيها نفسي  قبل ما اقولها لاي شخص :)

1- اكتبي لسته بالأشياء الي لازم تسويها !!

انا اعشق الليست وترا انا عن نفسي مررة احس بالإحباط لما يجي اخر اليوم ما قدرت انجز اكتر من نص الي مكتوب عشان كدا دائما وابدا لما اكتب لسته أحاول أكون عقلانيه هل فعلا هقدر اخلص وانجز الي مكتوب فيها اليوم

2- رتبي اولوياتك!

لما تيجي تكتبي اللسته .. حاولي تغيري لون القلم لما تكتبي المهام الي لازم تتسوى قبل الثانية او تحديدها بالماركر .. عشان تنحفظ الصورة في ذهنك ان دي الأشياء الي لازم اركز انجزها اليوم

3- جزئي المهام!

لا تكتبي اليوم هرتب الغرفة كلها ! مع انه ممكن تسويها ولكن الانسان ملول بطبعه .. ليش ما تجزئيها على يومين او 3 انا عن نفسي اجلس أسبوع في غرفتي .. كل يوم جزء عشان أولا اسويها باتقان ثانيا أقدر انجز ولو انجاز صغير في اليوم الواحد!

4- حددي مواعيد للانتهاء من المهمة

بمعنى .. عندك بحث يتسلم كمان شهر .. لا تستني قبلها باسبوع ! لا جزئي على شهر .. أسبوع هدور على المراجع  واسبوع هختار المواضيع الي هاخد منها واسبوع عشان انقل الي يعجبي واسبوع عشان ارتب البحث واطبعه .. وكل أسبوع حددي موعد للانتهاء من المهمة عشان لو ما انتهيتي منها تحسي انك ملزمة تخلصيها في اقرب وقت

5- قللي من المشتتات

طيب هتكلم عن نفسي .. انا بالصراحة اكثر شي يشتتني الجوااااااااااال  المواقع الاجتماعية .. انستجرام وبنترست ممكن اجلس بالاربعين دقيقة وما اطل في الوقت ! وطبعا مررة بنضيع وقت في أشياء ثانيه .. حاولي تكتبي ايش الأشياء الي بجد بتشتت انتباهك .. تلفزيون ولا مكالمات ولا واتس اب ؟؟ وحاول مع الوقت تعملي كنترول على نفسك عشان تقدري تنجزي

6- سويلك جو خاص :)

بمعنى .. مثلا انا مرة اجلس على مكتبي كثيرر اغلب دراستي وشغلي احتاج المكتب فيها .. زبطي المكتب وخليه يحمسك .. اذا انت من النوع الي اول ما تجلسي على مكتبك تبغي تذاكري يجيكي النوم! يصير حاولي تعلقي صور فيها الوان ملفته عشان تصحصحك .. علقي لوحة فيها لستة الأشياء الي لازم تسويها .. حاولي تكوني مركزة ومرتبة وقتك ومحفزة نفسك على الإنجاز

7- خلي اهدافك لنفسك!!

بجد دا الشي مرررررررررة مهم ما كنت اعرف دي المعلومة القيمة الا قريب!! وهي ان الانسان لما يكون عنده اهداف اذا جلس يقولها لكل الناس مو انها ما راح تتحقق عشان العين ولا عشان انه تصيرلك ظروف ما تقدري تسويها (كل دا ممكن يصير) ولكن ايش الي يطفي حماسك عن اهدافك؟؟ السبب العلمي ... انك لما تقعدي تتكلمي عنها مع الناس وطول الوقت مخك بيحس بمتعة الإنجاز .. ومع الوقت بتفقدي الحماس انك تنجزيها لانك وصلتي  لشعور الإنجاز من حماسك في الكلام !! وعشان كدا ( استعينوا على إنجاح الحوائج بالكتمان، فإن كل ذي نعمة محسود. )

8- كافئي نفسك ..

مهما انجازاتك صغيرة كافئي نفسك .. انا ممكن اكافئ نفسي بكاسة شاي وروقان ... ممكن اكافئ نفسي لما اخلص ريبورت اني اروح السبا .. يعني كل انسان ليه طريقة الخاصة بس بجد لما تنجزي شي وتعودي نفسك انك تكافئيها هتصيري تتحمسي تنجزي اكثر :)

وأخيرا دايما ذكري نفسك انك كل ما انجزتي اسرع كل ما ريحتي بالك اسرع :))

ن

8 comments وجهة نظر