رحلة أسبانيا .. نظرة شاملة

اهلين :)))

ادري صارلي اكثر من سنة منقطعة عن التدوين .. وحشتني المدونة جدااااااا .. بصراحة ما صار شي مرة مهم غير اني اشتغلت وشغلي الجديد فيه سفر كثير (ابدا مو بسطة كلها الرياض والدمام !) ..  مع شوية كسل وعليهم شوية انشغال .. الزبدة راجعتلكم بمواضيع  مررة حلوة:)

خليني اتكلم عن اسبانيا شوية .. 

عام 2013 اخذت قرار مهم في حياتي وهي اني اخطط لسفرة كامله اعتمد فيها على نفسي ماديا و تخطيطيا! بمعنى طول عمري بسافر مع اهلي ما بشيل هم اي شي اكل سكن مواصلات طلعات شوبينج .. دي المره قلت لا وجلست مع اخويا واختي واتفقنا.. كل واحد هيدفع لنفسه كل شي والسفرة اسبوع بالقطة!

الحافز كان .. ان اختي كانت هتتزوج ودي اخر مرة نكون احنا ال 3 مع بعض بدون زوج او اطفال.. (رحلة توديع العزوبية )

انا كنت مسؤلة عن التخطيط الكامل.. كان فكرتي انه خلينا نجرب السفر مرة بدون شوبينج ويصير شعار السفرة ( سياحة فقط)

بصراحة كان في عامل مؤثر .. صحبتنا كانت بتسوي ماستر هناك وبتتكلم اسباني زبطتلنا الحجوزات وكل شي وطلعت معانا وفرقت كثير لانهم ما يحبو يتكلمو انجليزي او ما يعرفوا..

طيب خليني اقلكم مسار الخطة..

كان اجازة بين الترمين وكان شهر مارس .. الجو كان رائع في اسبانيا لانها حر في الصيف ومو مرة بارده في الشتا .. وقت الربيع او الخريف ما تكون برد بس تكون مطر وفي هوا .. 

كنت ابغى الطيران السعودي ولقيت التذكره في حدود 7 الاف فدورت على الارخص لقيت القطرية .. في حدود 3 الاف ونص .. ترانزيت في الدوحة 6 ساعات  .. وبعدها 6 ساعات طيران الى مدريد..

في اسبوع خططنا نروح .. مدريد .. فلنسيا .. قرطبة .. اشبيلية .. غرناطة .. وكل التنقلات الداخلية كانت بالقطار :)))

من اروع الرحلات في حياتي عرفت اني اقدر اخطط وانفذ وامشي على ميزانية معينة وارتب اولوياتي والاهم .. ما سويت شوبينج وعرفت معنى السفر من اجل السياحة :)

ليش بحكيكم على سفر من 2013 ؟ .. عشان من شهر سافرت اسبانيا تاني .. وقلت لا البلد تستاهل وابغى احكيكم السفرتين لان كل سفرة رحت اماكن وزرت مدن مختلفة ..

البوستات هتكون كالاتي ..

مدريد .. MADRID

فلنسيا .. VALENCIA

الاندلس .. ANDALUSIA

 كتالونيا / برشلونة ..  CATALONIA 

ان شاء الله تستفيدو وتنبسطو معايا .. 

ن

Leave a Comment السفر