اهلين :)
اشتقت للمدونة والتدوين .. صارلي 6 شهور ما كتبت بوست واحد :( شيء محزن لكن كنت مرة مضغوطة وسافرت فترة طويلة .. وما كان عندي وقت اكتب ولا الاقي نت كويس احمل عليه الصور ..
الزبدة .. كان المفروض اني كل شهر اتكلم عن هدف من الاهداف .. قدر الله ما شاء فعل ..على الصعيد الشخصي .. اشتغلت على اهدافي .. وبالعكس الحمدلله في اشياء كثير اتغيرت فيا للافضل الحمدلله .. لكن بخصوص المدونة ماراح اكتب هدف لكل شهر .. لكن هتكلم عن الموضوع نفسه ..
حابة ترجعي للبوست حق اهدافي ل 2015 .. وكتبت فكرتي دي السنة مبدأ التركيز 12 هدف في 12 شهر .. حابه تقري عن الموضوع في الرابط:
اليوم موضوعنا عن مبدأ اساسي في حياة الناس .. ومن الاكثر المبادئ الي الانسان لازم يعيش بيها ..
مبدأ التحرر او اطلاق السراح .. وهو عكس التمسك او التشبث بالاشياء او الاشخاص ..
.. الحقيقة تكمن في كلمة وحده التحرر .. التحرر من كل المشاعر السلبية .. من الغضب .. من الحزن .. من رواسب لعلاقات اذتنا نفسيا .. من اي شيء يوقفنا من اننا نتقبل نفسنا ونتطور منها ..
الموضوع متشعب وكبير .. وفكرت كثير ايش افضل طريقة اتكلم فيها .. لقيت اني اجاوب على 4 اسئلة ..
1-
ايش معنى التحرر؟
معناه التقدم في الحياة مع اطلاق السراح لاي مشاعر سلبية او مؤلمة مرتبطة باحداث او اشخاص في الماضي او الحاضر
2-
متى وقته؟
الوقت المناسب لك!
3-
ليش لازم نمر بدي المرحلة؟
عشان في شعور بعد الرضى والراحة عن انفسنا .. وبيكون بسبب ان في احساس معين ناتج عن شخص او موقف بيأثر فينا جدا .. لدرجة محنا قادرين نتقدم في حياتنا .. ومرات نوقف حياتنا في دي المرحلة ..
كم مرة شعرتي باحساس انك الضحية .. وجلستي تقنعي نفسك والي حولك بكذا؟؟
كم مرة حسيتي الحياة مملة ومافيها اي جديد؟ وما في شي بيتغير للاحسن؟
كم مرة حسيتي انك تعيسة ومانتي راضية عن نفسك ولا عن وضعك؟ وحياتك عبارة عن انك معترضة على كل شي!
كم مرة كنتي في علاقة (سواء صداقة او زواج) اثرت بشكل سلبي عليكي واستنزفت كل طاقتك الايجابية .. وكانت مصحوبة بالالم؟
دي المشاعر كلها والاسباب بتخلينا نتفق انه لازم نتغير والتغير يكون بالتحرر ..
4-
كيف ممكن نتحرر؟
تقبلي الحقيقة وكوني شاكرة
شوفي اخطائك كأنها هدية بتتعلمي منها تكوني افضل
ركزي على نفسك على مودك على ايجابيتك على يومك وحاضرك
كوني متأكدة مافي احد مسؤل عن حياتك غيرك انت!! .. كوني قدها
ابعدي فترة عن الناس ( حاولي تتعرفي على ذاتك الجديدة)
سامحي .. نفسك اولا ومن ثم كل الناس الي غلطو في حقك .. لانك بكدا تكوني اتحررتي حتى من مشاعرك السلبية اتجاههم!
ن
التحرر مهم جداً بس مرات يكون فيه شيء من الصعوبة إذا كانت العاطفة المرتبطة بالأشخاص أو الأماكن قوية و عميقة
ReplyDeleteهنا يحتاج الإنسان وقت أطول حتى يتحرر ,
نقطة انه لازم يبتعد فترة عن الناس أنا معاك فيها أقل شيء لو مو إبتعاد حسي يكون إبتعاد عاطفي و فكري ,
البعد مريح جداً يحررك من الإرتباطات و يعطيك مجال تفكري في نفسك في شخصيتك في وضعك النفسي
و الإجتماعي و الديني و وضعك المادي حتى عشان تصححيه ..
تسلم يدك ع هيك بوست :*
حبيت البوست و حبيت أشاركك <3
اهلين مريم :) انا معاكي في الي قلتيه .. وفعلا التحرر مو قرار سهل ابدا .. وكل ما كان الموضوع كبير وعميق في نفسك .. كل ما كان التحرر اصعب واطول .. بس بالنهاية النسيان نعمة :))
Delete