الاستعداد النفسي للجامعة

اهلين :)

اليوم موضوعنا مختلف .. جاني تاج من فترة من الجميلة الاء سعيد .. على الانستجرام عن استعداداتك للجامعه وكيف تكوني مستعده .. في ناس اتكلمت عن المكياج .. في ناس اتكلمت عن الملابس .. مرة عجبتني نصايحهم .. بس انا حبيت أتكلم عن شي مختلف .. ابغى أتكلم عن استعدادك النفسي للجامعه ..

ليش اخترت أتكلم عن الموضوع دا بالذات؟ عشان انا عانيت في اول سنه ليا في الجامعه ..

طيب هتكلم عن نفسي شوية ..

انا من وانا أولى روضة الى توجيهي في نفس المدرسة مع نفس الطالبات اتغيرت الفصول اتغير المبنى لكن القيم وحده الأنظمة وحده الجو العام للمدرسة واحد الاداريات نفسهم .. كنت حاسه اني في بيتي الثاني مو في المدرسة ..

كان جداااااااااااا ممل إحساس اني رايحة المدرسة مو عشان الحصص لا عشان انا انسانه اكره الروتين ..

فتخيلو نفس الجو كل يوم وكل سنة ولمدة 15 سنة !!

الزبده .. كنت مشاغبة نوعا ما (بس ماني قليلة ادب او قليلة ذوق) بس عشان ما كنت احب اجلس في الفصل كتير .. ولا كنت احب الروتين فكنت دايما برة الفصل وديما اتهزأ!

كنت مرررررررة متحمسه على الجامعه!! والسبب الأساسي للأسف! اني اقدر اكنسل المحاضرات وما احضر ومحد هيجري ورايا ليش ما تحضري؟

كنت أتمنى يكون عندي صديقة او اخت او حتى وحده من قريباتي تيجي تتكلم معايا عن التغير الجذري الي هيحصل في حياتك..

ما صار دا الشي والحمدلله اتخرجت من الجامعه بخير .. ولكن النصايح دي مرررة كانت هتفرق معايا وتختصر عليا أشياء كتيرر..

عشان كدا حابه أتكلم معاكم كاخت :)

اول شي : كوني منفتحة ..

يعني ايش منفتحة؟ يعني متقبله لغيرك .. مو منفتحة انو سوي كل شي اطلعي بره حدود المألوف .. لا اقصد خليكي مرنة .. في أشياء كثير هتصدمك .. خصوصا من البنات .. اتقبلي .. وبجد لا تنتقدي احد .. هتشوفي كل الأنواع والاشكال .. ناس مررررررررة مهم زيك ولا زي طبعك ولا عاداتك ولا كانهم من البلد الي انت عايشه فيا .. عادي! طبيعي .. من فصل فيه 20 او 30 بنت الى محاضرة فيها 50 الى 70 طالبة .. الطبيعي تشوفي كل شي وتتعاملي مع ناس في حياتك ما كنت تتخيلي ممكن تقابليهم .. ما بقول دا الكلام بشكل سلبي.. لا بس اقصد تقبلي اختلاف غيرك .. وخلي الجامعه حجر تغير في حياتك من حيث انك بدأت تتعلمي ثقافة الاختلاف وتحترمي غيرك باختلافه عنك..

ثاني شي: كوني نفسك..

ادري ناس كثيررررررر اتكلمو عنها.. بس انا ابغى اقولها بشكل ثاني .. كوني نفسك الي انت حابه تكوني عليها ..

مهما كان شكلك تصرفاتك طباعك وضعك الدراسي .. في المدرسة انسيه .. انت دحين النسخة الجديده المحدثه منك .. اقعدي فكري انا كيف ابغى الناس تتكلم عني .. ايش افضل صوة احب اشوف نفسي عليها .. حاولي تكوني نفسك بطريقة محسنة .. ديما اجلسي مع نفسك وواجهيها وتطوري فيها .. عشان تكوني راضية عن نفسك :)

ثالث شي : لا للغيبة ..

هقولها بالانجليزي عشان مفهومه اكثر NO GOSSIP

اتعب اقلك قد ايش دا الشي مهم .. الجوسب حقت الجامعه مرررررة حلوة والانسان بطبعه فضولي .. لو في شي واحد هطلب منك تتخلي عنه تماماااااااااااااااا هي الغيبة .. ما تتخيلي مشاكلها وترا تجلس ما تروح وهي قالت وهي عادت وهي سوت وهي وهي وهي ..

ما بقلك لا تكوني صداقات .. لا بالعكس ! بس مرررة انتبهي على كلامك وعلى ردود افعالك لو احد قدامك قاعد يحكي ويتكلم ..

حتى لو انت في اخر سنة في الجامعه وصحبتك تعرفيها من أيام المدرسة ! لا انتبهي .. ما بقلك اتقوقعي على نفسك وكوني انطوائيه لا .. بس انتبهي الكلام بجد بيدور ويوصل بطريقة مشوهه !

رابع شي: دراستك = مستقبلك

ناس كتيررر كرهو فكرة التحضيري.. مع انهم هما هما الناس الي يبغو يدرسو برة .. وبرة من زمااااااان في كل جامعاتهم عندهم تحضيري!

المهم .. التحضيري من اصعب السنوات .. مو بس لانك بتتعرفي على عالم جديد وناس ودكاتره وجامعه كبيرة .. لا لانك حاطه تخصص في بالك وتبغي تدخليه.. فلازم تبذلي مجهود اكبر .. تكوني طالعه من ضغط توجيهي تدخلي في ضغط التحضيري..

عشان كدا لازم تسألي نفسك ايش ال3 تخصصات الي ابغاها واحس اني اقدر اكمل فيها طول عمري.. واقدر اشتغل بيها شي انبسط فيه!! لا تحصري نفسك في تخصص واحد وتتحطم كل طموحاتك ا1ا ما دخلتي دا التخصص.. لا خليكي مرنة اجلسي مع نفسك وفكري وديما تقولي لنفسك وايش كمان .. مثلا احب اللغات وايش كمان؟ احب التاريخ وايش كمان .. الين تحاولي توصلي لمرحلة ان ال3 اختيارات راضية عنهم ..

ونقطة كان مهمه .. دراستك الجامعيه ماهي نهاية العالم .. ناس كتيررر درسو شي واشتغلو في شي تاني وسو ماستر في شي ثالث!

اهم شي انك تكوني داخله تخصص تتميزي فيه وكمان تستفيدي منه :)

خامس شي: انتقي صحباتك ..

لو عندك صحبات من المدرسة ومرررة قريبين منك حلو .. كملي معاهم حبيتي تزودي عليهم صحبة او 2 او حتى 5 من الجامعه جميل .. ولكن اذا كنتي تبغي تنسي المدرسة بصحبات المدرسة وتبغي تبدأي صفحة جديدة .. ممتاز .. لكن ! انتبهي .. خلي العلاقة دراسيه في الأول .. داخل الجامعه .. لا تتكلمي كثير عن خصوصياتك وعيلتك .. ما بقول كوني سطيحة .. بالعكس ! بس اتكلمي عن الأشياء الي تخصك وتعنيهم .. مو الأشياء الي ما تخصهم ولا يهمهم يعرفوها :)

سادي شي: كوني مرتبة

رتبي افكارك .. رتبي اولوياتك .. رتبي اغراضك .. رتبي جدولك .. رتبي محاضراتك .. رتبي نفسك وشكلك ولبسك .. صدقيني لو اعطيتي نفسك وقت عشان تترتبي من جوا ومن برة هتلاقي نفسك مرتاحة وراضية عن ذاتك :)

ما هتعرفي ايش الطريقة المثالية للترتيب غير مع التكرار ومرة تزبط ومرة لا بس مع الوقت هتلاقي المعادلة الأنسب ليكي ..

اكيد في نصائح اكتر بس انا بطبعي ما احب اعيد وازيد :) فحاولت اجمع اكثر نصايح حسيت انها تفرق مع أي بنت مستجده على الجامعه او حتى في ثاني او ثالث سنة بس تحاول تبدأ بنفسية جديده :)

ولأول مرة مافي ولا صورة في البوست :)))))))))

ن

6 comments وجهة نظر