تقيم مطعم اصيل.. Aseil Resturant

اهلين :))

اليوم هتكلم عن مطعم اصيل ..

نبدأ بالفكرة .. الفكرة جدا مميزة مع سرعة الحياة وانشغال الناس .. صار اغلب اكلنا من برة .. اذا مو غدا يصير عشا وصار أي احد يبغى يتقابل مع اصحابه برة .. وطبعا كترت مطاعم البرجر والايطالي والصيني والهندي ..

فجا اصيل بشيء مختلف ومميز.. وهو مطعم سعودي وأكل سعودي متنوع من كل مناطق المملكة ..

من فترة كان أي شخص اجنبي يجي على جده لازم يروح البلد .. وبعد كدا مطعم النخيل .. عشان جلساته وقعدته اوريانتل .. طيب جميل بس الاكل نصه لبناني والنص التاني سعودي ..

اصيل جا بالفكرة حقت كل شي سعودي الديكور وستايل ونكهه وكل شي ..

المحل في مجملة جميل ومريح الاضاءة جيده والالوان ترابية تعيشك في جو الاصالة .. الديكورات مميزة جدا حتى الصحون والاطباق مختلفة ومرتبطة ب الوان وفكرة المطعم ..

الخدمة فيه حسب الزحمة طبعا .. بس معايا كانت سريعة زرته اكثر من 4 مرات

في حركة جميلة ان في رجال بالزي السعودي يباشركم قهوة طول الوقت من اول ما تقعدي الين يوصلك الاكل ..

نيجي للاسعار .. انا اشوفها متوسطة ولكن ! على اكل احنا ممكن نسوي زيو في البيت طبعا مرتفعه .. وكمان الكميات قليلة وصغيرة على السعر!

الجلسات قريبه من بعض .. مافيها خصوصية ولكن .. اختاري وقت يكون فاضي اذا تبغي تروقي او اذا مو مرة يهمك عادي روحي أي وقت ..

يستحق الزيارة والتجربة واتمنى تاخدو بنصيحتي في اختيار الاطباق :)))

نوقف كلام و نخلي الصور تتكلم شوية :)

هبدأ باديكور المحل من جوه .. .

وبعد كدا بالاكل الي طلبناه .. واخيرا الجلسات الخارجية

احب اقول اني عادتا اطلب اشياء اساسيه!

وكل مرة احاول اجرب شي واحد جديد

يومها كنت مع مجموعة من البنات .. وكل وحده طلبت طلبها المفضل..

نبدأ بالز شي عندهم .. عيش باللحم!!

اتعب اقول رائع .. صراحة في بيتنا يكون انشف شوية بس لزيزززز والخلطة وكل شي حتى طريقة التقديم..

صحبتي قالت مشتهيه سمبوسك بالجبنه.. وقلتلها انه مره مالو داعي .. تروحي مطعم عشان تطلبي سمبوسك بالجبنه؟ بس! ما اتوقعت تكون لذيذه كدا..

نيجي لطلبي المفضل عندهم :)) جريش بالجبنه

طيب .. احنا ماما ما تسوية جدتي الله يرحمها كانت تسوية وكان غير .. بس حقهم لزيز وجديد وفيه جبنه على الوجه وصدر دجاج مخلي في النص..

وحده من البنات طلبت منتو .. انا احسه حلو بس عادي مافي شي يميزة بصراحة وعلى السعر .. حق البيت افضل!

ملجأي وقت الدايت و استحالة اغير السلطة دي .. لانها جرجير وبالحمر !! اعشقها .. وفي شي تاني عشان يكون التتش حق اصيل .. في قطع تمر صغيرة تعطي نكهة جدا جميلة..