Resolutions .. اهدافي (قراراتي) ل 2014

اهلين ..

اليوم الموضوع شوية مختلف ولو انه اغلب الناس بيسووه! ..

من فترة وانا قاعده افكر ايش اكتب في دا البوست ؟؟

هل اتفلسف؟ واقعد اقول الطريقة النمطية حقت لازم تقعدي مع نفسك وتفكري ايش تبغي تسوي وتكتبي لسته؟؟ 1- 2- 3-؟

مع العلم ان عشقي اللست!!

بصراحة.. ما كان عندي وقت اقعد ارتب افكار واكتب بوست قوي وكلامه دسم ومدري المحصلة هتكون مملة ولا لا!

قلت خليني اتكلم معاكم كاني بتكلم مع نفسي..

وخليني بصراحة احكيكم عن تجربتي السنوية مع موضوع صياغة الاهداف!!

نبدأ باول شي..

ليش بختار السنة الميلاديه؟ ليش مو الهجرية؟

الموضوع ببساطة انا من مواليد ديسمبر .. عشان كدا كل سنة احب اكتب اهدافي مع بداية سنة ميلادي ..

تاني نقطة..

70% من الاهداف الي بكتبها لا ترى النور :((( خبر جدا سيئ

بس انا لازم اكون صريحة!

ثالث شي..

جربت طرق كثيررر في صياغة الاهداف

اللسته!

بالشهور

ال mind maps (الخرائط الذهنيه)

الجداول ..

الزبدة كلهم ما حققوا النتائج المطلوبة بالنسبة ليا

ولذلك !!!  قررت ان  2014 تكون سنة  التغير للافضل..

طيب..  كيف؟

نراجع تاريخي المشرف في كتابة الاهداف :(

كم مرة كتبت

اوصل للوزن المثالي؟؟ وما وصلت!!!!

كم مرة كتبت احافظ على الصلاة النافلة :( وللاسف كتير بنسى او انشغل!!

كم مرة كتبت اقراء قران كل يوم .. وعليكم خير كل جمعة بقراء سورة الكهف وخلاص! (بعيدا عن شهر رمضان)

كم مرة كتبت اروح النادي كل يوم؟؟ بسجل وما بروح

كم مرة كتبت اصل رحمي مرة في الاسبوع؟ لو مرة في الشهر ممتاز!

المشكلة والحل؟؟

باكتب اكتر 20 هدف واشتت نفسي؟؟  وما اعرف مين فيهم الاهم؟

 بركز على جزء معين من مشاكلي واطنش الباقي؟

بخليها بدون وقت محدد!

بكتبها بطريقة غير متسلسلة وكلها بصيغة الامر!

كلهم مرررة مثالين!!

لقيت ان المشكلة الحقيقة تكمن في ان التغير صعب وصعب جدا كمان لاننا عايشين نفس الوضع مع نفس الناس بنفس الطريقة ..

والحل هو في حديث الرسول صلى الله عليه وسلم.. "أحب الأعمال إلى الله: أدومها وإن قل"

بمعنى اخر .. قررت ان كل اهدافي تكون تحت شعار ( قليل دائم خير من كثير منقطع )

ما ابغى احط اهداف كبيرة تحتاج ارادة ومثابرة لمدة 12 شهر ! لان الانسان بطبيعته حماسه يروح ويجي وانا عندي يرووووووووووووووووووووح ويجي :))

الخلطة الجديده :)

لازم كل هدف يكون ...

لازم اطل في يومي قبل لا افكر ايش هكتب .؟

افكر حياتي مقسمة في ايش؟

علاقتي بربنا

علاقتي باهلي 

صحتي

عقلي

المجتمع والاصدقاء

الدراسة

العمل

المتعة

المال

واسال نفسي 3 على كل هدف اكتبه..

اولا : أيش اهم شي لازم احققه دي السنة في دا الجزء من حياتي؟

ثانيا: كيف هحقق الهدف دا؟ ايش الطريقة الي هتوصلني لتحقيق هدفي؟

ثالثا: متى هبدأ على تحقيق الهدف وفي قد ايش؟

ناخد مثال؟

في الصحة ..

1- من اهم الاشياء الي ابغى اركز عليها دي السنة اني اكل اكل صحي على قد ما اقدر .. طبعا كدا الكلام عايم على بعضو وجميل ونظري ! خليني اجاوب على السؤالين الي بعدها..

2- هشرب 5 مرات في الاسبوع جرين سموذي (بالسبانخ) وما هسمح لنفسي بالحلا الا مرة وحده في الاسبوع  (ماعدا في ايام السفر)

في اليوم الي ما هشرب فيه السموذي لازم اكنسل وجبة !

3- هبدأ في تحقيق الهدف بدايتا من 6 يناير ان شاء الله.. استمر عليه طول السنة واراجع التغير كل 6 اسابيع..

حابه الشكل النهائي للاهداف كدا..

بس تكون محدده والنتائج تكون مكتوبة عشان اقدر كل شوية اطل عليها وقارنها بالانجاز.. واقدر اعرف كم باقيلي لتحقيق

 الهدف

من الاشياء كمان الي ابغى اعود نفسي عليها نفسي ..

**اجلس كل يوم مع نفسي 5 دقائق اراجع اهدافي وكم في المية حققت منها؟.؟

**التفاااااااااااااااااااااااااؤل اساس كل شيء :)

**اجدد النية وادعي ربنا دايما يقدرني اكون افضل ..

قررت اكون جدا مقتصدة في الاهداف .. واركز كل مجهودي في 4 اهداف فقط لدي السنة .. اعرف شكلهم قليل .. بس بصراحة زي ما قلت قليل دائم خير من كثير منقطع .. وهحاول افلتر اربع اهم اشياء احتاج فعلا احققها عشان اتغير للافضل واكون فعلا انجزت :))

اتمنى تكونوا استفدتو وان شاء الله تكون سنة مليئة بالإنجازات والنجاحات يارب :)))

ن

2 comments وجهة نظر