تقيم محل منش مالح

اهلين :)

حابه اسوي ريفيوهات عن محلات المطاعم واي مكان اصادفه جديد.. بحيث انه نستفيد ونقدر نعرف ايش المميزات والعيوب لكل مكان وشيء

منش مالح فكرة جميلة وجديده وخصوصا بعد الشهرة والسمعة الي عملها منش حق الكب كيك..

انا رحت في رمضان .. وكان لسه فاتح.. يمكن دحين اتحسن؟ يمكن دحين جاته تعليقات اكتر؟ الله اعلم

بس هتكلم معاكم عن تجربتي في المحل والطلبات والاسعار والطعم..

اول شي المكان في جده.. ما بين الروضة والصاري ( شارع عبدالمقصود خوجة)

المحل ديكوره حلو.. وهما فاتحين فرعين جنب بعض واحد حلو والتاني مالح..

من الخارج..

ومن الداخل..

الملون الي فوق دا عيش عادي بس حاطين معاه الوان ينباع .. للحفلات وللي يبغى عادي..

عندهم كمان مخبوزات ( انواع من الخبز) ودا شي حلو في حد ذاته .. بس ما جربتها

طيب..

المميزات:

1- نيجي لاكتر شي لفت نظري وجدا جدا جدا اعجبت بيه!!

عدد الموظفات البنات  السعوديات اكثر من الرجال.. سواء السعودين او الاجانب..

جدا عجبني تعاملهم الراقي وسرعتهم وابهرتني جديتهم واتقانهم للتعامل..

2- المكان مريح وحلو .. ريحته حلوة.. مساحة كويسه حتى لو زحمة لسه في مكان نوقف ونطلب..

3- الطلب الي طلبته طلع لزيز..

4- التعامل والخدمة اكثر ن رائع..

5- التغليف والتعبئه جيده جدا

السلبيات..

1- الاسعار عاليه..

2- والطعم للاشياء الي جربتها غير الي طلبته جدا عادي .. ممكن اسوي زيو في البيت

3- التشكيلة مو مرة كبيرة.. كأنه مخصص للحفلات وبس ونوعين او تلاته والتغير في الحشوات وخلاص..

انا طلبت بيتزا.. لاني كنت مشتهيه شي يشبع وحار .. وكانت لزيزة.. بس مقارنتا بحقت الدانوب مثلاّ  ( وبقارنها بالدانوب لانها نفس الشكل والتكوين) طبعا اغلى وحجمها اصغر كمان!

ياريت الي تروح وتجرب تقلي رأيها وايش عجبها :)

ن

1 comment المطاعم