DIY -.. سويها بنفسك - لوحة ديكور

اهلين :))

اليوم الموضوع مختلف وجديد!

حابه اشاركم اعمالي البسيطة الي من جد بتطلعني من المود!! وحتى لو هي مرة بسيطة او سخيفة بس بنبسط اني سويتها..

 الافكار دي كلها ماهي من راسي للاسف .. بشوفها على اكتر ابليكيشن يضيعلي وقتي ! وماهو الانستقراام!

هو http://www.pinterest.com/

بجد ادمااان!!

في اشياء مرة تحمس..

طيب اول شي ايش تحتاجي؟؟

1- لوح كانفاس

  ممكن تلاقيها في أي مكتبة اسأليه ابغى لوح كانفاس CANVAS

حتى في الباشاوات لقيها موجوده طبعا جودتها مو مرة بس عادي احس ماحنا رسامين بس تمشي الحال..

2- الوان اكليريك

نفس الشي في أي مكتبة اسالي عليها .. لا تاخدي احجام كبيرة لانها هتجلس كتيرر معاكي وخدي الالوان الي تحبيها

3- فرش للتلوين (كبيرة نوعا ما)

4- باليت للالوان

5- شريط لاصق الي لونو ابيض او بيج

يفضل تجيبي سمكين يطلع احلى..

وتقريبا دي كل الطلبات ..

ما اظن تزيد عن 70 ريال..

نشوف الصور؟؟

الطلبات :)

حبيت ما يكونو نفس الحجم عشان يعني يطلع شكلهم احلى .. بس دا شيء راجع للذوق الشخصي وكمان مساحة المكان الي هتعلقي فيها اللوح!

الخطوات ..

هنرتب اللوح بالشكل الي يعجبنا..

ونبدأ نلصق بشكل عشوائي ونكمل عليهم ال3 مع بعض ..

الصور هتوضح اكثر

وحبيت استخدم واحد نحيف والثاني سميك عشان يسوي حركة :)

الشكل النهائي الي استقريت عليه..

نقص عشان نبدأ نلون :))

نقطة مرررة مهمة لا ننساها ..

نرقم اللوح  وكمان انا حطيت  حرف  T - TOP   يعني الجهه الي فوق عشان بعد كدا وانا بعلقهم لا اتلخبط..

نيجي للتلوين ..

طيب انا اخترت الالوان الي تتناسب مع الغرفة..

وفي لونين دمجتهم مع بعض البنفسجي الغامق مع الابيض عشان يعطينا لون افتح ..

بدأت الون وفي نقطة مهمة .. هتتوضح من الصور ..

المثلث الي مكمل في الوحة التانيه لونية نفس اللون  عشان يكون كانهم لوحة وحده وانفصلو.. 

بكدا خلصنا .. نستنى لمدة ساعتين عشان تنشف قبل لا نشيل اللصق..

لا تنسي تغسليها !! عشان لا تحوسي لان الالون تلصق!

شلت اللصق كله .. وصار الشكل النهائي .. ونحتاج بعض الرتوش البسيطة ..

اتمنى يكون عجبكم .. وياريت تسوو زيها او افكار احلى منها وتشاركوني بالصور :))

ن

4 comments إصنعها بنفسك