Sephora - Makeup forever/ مشترياتي من سيفورا الجزء الثالث - مايكب فور ايفير

اهلين ..

اليوم مكملة معاكم الجزء الاخير من مشتريات سيفورا ..

البوست اليوم هيكون لماركة مايكب فور ايفير..

وتحديدا ال

HD line

المجموعة الي اشتريتها ..

كريم اساس وبرايمر ومعاه كونسيلير وبودرة تثبيت .. وفي النهاية اخذت ايلينر

ليش اخترت مايكب فور ايفير؟

بالصراحة جربت مررة انواع كثيررر من الفوندايشن حتى ماك وحتى الغالي او رخيص .. احس في شي في بشرتي مو مزبوط

الين مرة كنت في صالون والي بتحطلي مايكب حطتلي مايكب فور ايفير HD

وفي ثانيتها حسيت بالفرق ..

طيب نيجي للسبب؟.

بشرتي صعبه لانها لاهي جافة ولا دهنية

واغلب المختلطة تكون دهنية من الخشم والجبهه والذقن  (تي زون )وعادية في الخدود

انا دهنية في الجبهة والذقن والخشم لكن جفوني وخدودي جافه!!

نرجع لموضوعنا مرة تعبت الين الاقي الفاوندايشن الي يناسب بشرتي ولقيته اخيرا!

نبدأ اول شي بالبرايمر..

هنا كيف لونه وقوامه ..

اخترت رقم 2 لونه بنفسجي فاتح

مميزاته..

اول شي ليش اخترت دا اللون .. عشان انا وجهي باهت نوعا ما  و الدرجة بتساعد على اشراق الوجه..

ثاني شي .. بيساعد على تثبيت المكياج وكمان تقليل الخطوط والمسام الي في الوجه وكمان يقلل من نسبة ظهور الدهون ويحافظ على  ثبات الفاوندايشن اطول وقت ممكن..

ثاني شي الفاوندايشن نفسه

اخذت درجة 140 .. وهي اغمق من لوني درجة  لاني احتاج شي يوحد لون بشرتي ..

اهم مميزاته ..

يناسب كل انواع البشرات وخصوصا الدهنية .. لانه في نسبة جل فيساعد على الحفاظ عليه ثابته على البشرة

مافيه أي نواع من واقي شمس ممتاز للتصوير مع الفلاش ..

تغطية متوسطة بطبقة وحده واذا عدتي عليها بطبقة ثانية هيكون تغطية كاملة

مناسب جدا للحفلات والمناسبات الكبيرة وكمان الي هتقعدي فيها بالمايكب فترة طويل وفيها تصوير

مرة مهم اذا بشرتك جافة تحطي كريم مرطب قبل كريم الاساس..

هنا مجموعة من درجات الفاوندايشن .. وانا اشوف ان افضل استخدام وتوزيع ليها بالبيوتي بلندر

طيب خلينا نشوف كيف قبل وبعد..

نيجي للكونسيليرر..

طيب القصه وما فيها اني ما عندي الحمدلله سواد تحت عيوني او شي بسيط مع كريم الاساس يتغطا ما يحتاج كونسيلر خاص..

بس عندي اثار حبوب اغمق من لون بشرتي

والنقطة الي مرررررة مهمه

الكونسيلير اذا تبغي تفتحي المنطقة تستخدي لون افتح من لون بشرتك بدرجة

لكن اذا تبغي تخفي عيوب لازم تستخدمي اغمق من لون بشرتك بدرجة

وانا جبت لون اغمق من بشرتي ولونه رايح على لون الخوخ شوية عشان يوحد لون البشرة رقم 335

335



انا من الناس الي مرات كثير ما احط كريم اساس واكتفي بالكونسيلر عشان اوحد لون بشرتي في المناطق الي احسها تحتاج وخلاص ..

ودي الدرجة جدا ناسبتني ومرررة حلوة ويندمج بسرعة وما يتكتل ومفعوله يدوم..

رابع شي بودرة التثبيت ..

مررة خفيفة ولونها ابيض بس  تحطي مررة شوية بالفرشة تاخد لون بشرتك.. وتثبتلك المايكب وجدا خفيفة ومريحة..

اخر شي ..

الاليلينر

اخدت ايلينر اسود مطفي من مجموعة الاكوا

Aqua eyeliner  Matte Black  

 جدا قوي وما ينمسح بسرعه وفرشته مرة حلوة ومرة ومريحة ..

وبكدا خلصت جميع مشترياتي من سيفورا :))

ن

Leave a Comment الجمال