اهلين :)
مرت 7 ايام على السنة الميلادية الجديدة وتقريبا اقل من شهر بشوية على يوم ميلادي .. ومرة اتأخرت اني اكتب اهدافي للسنة الجديدة ..
بصراحة قعدت افكر اني ابغى شي مختلف وطفشت من ال 4 او 6 اهداف الي لازم امشي عليهم ..
فقررت اغير اهدافي وطريقة تطبيقها!
ايش الجديد؟ وليش؟
اهدافي دي السنة هتكون كثير ! 12 هدف! بس الفرق اني هتبع مبدأ التركيز..
بمعنى في 12 عادة احتاج ادخلهم في حياتي واستمر عليهم .. ما ابغى اشتت نفسي وعشان كدا كل عادة هركز عليها اني اطبقها شهر كامل باستمرار وبتركيز .. واحاول اتقنها واخليها جزء من حياتي عشان استمر فيها..
ليش فكرت في دي الطريقة؟
اكتشفت ان اكثر شيء بيعيقني عن تحقيق اهدافي هي عاداتي! بصراحة ليش ما بنستمر؟ ليش بنوقف؟ ليش بنحس باليأس؟ ليش بنأجل احلامنا؟ ليش ما بنوصل للي نبغاه؟
لاننا بنكتب اهداف .. في المقابل ما بنطوع عاداتنا عشان تحققلنا دي الاهداف!
حابة 2015 تكون من مختلفة في قرارتي واهدافي وفي نفسيتي وردود افعالي .. ابغى اكون متحكمة في ذاتي اكثر واعرف اضبط مشاعري واقدر اتأقلم وانبسط واعيش اللحظة واكون ايجابية دائما ...
هشاركم ال 12 عادة .. ومع نهاية كل شهر بإذن الله هعملكم update بالي صاير معايا .. وهل فعلا اتغيرت؟ وكيف التغير وايش الي ساعدني وايش الي وقفني وايش مرة كان صعب عليا :)
الموضوع مو سهل .. لاني احتاج اركز واذكر نفسي كل يوم ان هذي مهمتي اني اتغير وتغير العادات يبغاله طولة بال .. وعشان كدا خليتها شهر عشان من جد اقدر اركز على نفسي كويس واذكر نفسي فيها
لا تستغربو من العادات .. ممكن تكون مرة شي بسيط بس اثرها في حياتي كبير وممكن العكس .. ممكن تحسو صباح الخير دوبها تنتبه لدا الشي؟ بس الحمدلله اني لحقت على نفسي :)
شهر يناير: اقوم قبل الفجر بنص ساعة
شهر فبراير: اطبق مبدأ (letting go)
شهر مارس: اسوي اي نوع رياضة كل يوم
شهر ابريل:اطبق مبدأ ترتيب الاولويات (first things first)
شهر مايو: افطر في خلال ساعة من وقت ما اصحى
شهر يونية: اطبق مبدأ الحديث و التحفيز الايجابي للذات
شهر يوليه: اتعلم اتقبل النواقص البشرية فيا وفي غيري
شهر اغسطس: اتعلم كيف اترتب واتأنتك كل يوم في اقل 15 دقيقة
شهر سبتمبر:اتعلم المجاملة المنطقية
شهر اكتوبر: التزم بنظام (detoxing) واكون نباتيه
شهر نوفمبر:احدد وقت لنفسي كل يوم (meditation)
شهر ديسمبر: التزم ب (to do list) شهر كامل
وعشان اساعد نفسي اكثر .. لازم اكتب يومياتي واكتب ايش صار معايا على الهدف حق كل شهر ..
موعدي معاكم 1 فبراير ان شاء الله احيكيم عن هدف شهر يناير وكيف قدرت اداوم عليه:)
ن
0 comments:
Post a Comment